1Cor 3 | SUE | STEP | Otao mamai naso, na gita nisokare nana kei awero ema Ozanare ge tugata wero nowena da ago ine nimorekare tugata wamu sero inomite te kaka wamu wena. Nera kota, be amire nikare ema Ozana tepo meni nuago inoiwa giro na Kristora mai uno nimorekare tugata wena awa.

1 Corinthians 3

Tuara dubu amira bua ema amira ge.

1 Otao mamai naso, na gita nisokare nana kei awero ema Ozanare ge tugata wero nowena da ago ine nimorekare tugata wamu sero inomite te kaka wamu wena. Nera kota, be amire nikare ema Ozana tepo meni nuago inoiwa giro na Kristora mai uno nimorekare tugata wena awa. 2 Tuara ge ou suru ine awa ma zewai ine, are na ma zewai awa nimorekare kaka potamu. Na ami-mu gege nimorekare potina. Ma zewai awa nikare nai ine tepo. Ata zeme emire nena zewai naira dai te oko inowa. 3 Nikare zeme dago Ozana tepo meni nuago inowewa. Nikare seu. Nikare wiza atatare dumu zuzuna gere ema tebe-tabe ine nowewa ami 4 ema Ozana tepo meni nuago inowewita? Nisokare nana eni meni “Na Paulora ema” asinowewa, ota eni meni “Na Apolora ema” asinowewa. Are ago toise zazaumuro nowewa ami tebe-tabe Ozana tepo ago ine nowewa, atonua!

5 Apolo nu nogo wai ni? Na Paulo, na nogo wai ni? Nato Tuara bua mai gege awa. Nato Tuara ge nimorekare tugata wenato niniwa. Tua meni bua namoreto senua te awa wenato awa. 6 Na Tuara ge awa ma we ine duba nisokarera urena awa. Ota Apolo meni awa iwe masa wenua awa. Ota Tua meni awa gawa wawi me kei awinowia awa. 7 Are zesero urero awinowia nu awa osai; ota iwe bua inowia nu da ago osai; ota gawa wawi me kei awinowia Anutu awa witai awa. 8 Zesero urero awinowia, nu ata iwe masa inowia, nuto wai nuto te daimata inoya. Buara zuma meni awa bua nusotora te awina-dawina wero potai pumamunorato. 9 Nato Apolore awa Anutura bua mai otao awa. Ota ninekare meni awa Anutura ma bua.

Tuara bua ema nu ibu wai ema ine awa.

Noko, nikare Anutura ibu awa. 10 Anutu meni namore buara putou potinua te na ibu wai ema me meni wago inoise zasiwi zewai-zawai urena dopenua awa. Amira tame ema eni meni susumuro ibu gapinora. Ago ine ami kotumu-kotumu wero wariseyo. 11 Zasiwi urena dopero itia awa Yesu Kristo awa. Ema meni nu sokero doro awero zo urai ine oko itia. 12 Are zasiwi amira tame zo meni ibu wamu sero nena zewai-zawai zuma bamure — golta, silvata, omata owe neinere — awa puro ibu ewanana wamunoita, nena beyata zuma tepo — sonata, yeketa, bigiwa — awa puro ibu wamunoi? 13 Awa noma be bamura ena ibu wai nusora susu awa kei damu namunoya awa. Amira ana niao bamu meni ibu waira bua nuso amira susu kerenamunoya. 14 Are ema zo meni zasiwira tame ibu zewai wamunoya, awa niao meni ibu awa awamu sero kaputai giro ema ibu wenua ami zuma ewanana pumamunoya. 15 Ota ema zora ibu meni awa niao meni awero tepo wai nu zuma oko pamunoya. Nu tepo nuamunoya awa. Nune meni awa kapo betai amire niaora ena soyamunoya awa. Ata wai nusora me awa awero tepo wamunoya awa.

Ema bama ge ninai awa Anutura ibu awa.

16 Nikare Anutura ibu wero nowewa, ata Anutura Ozana meni nisokare nana itai-matai inowia, awa kaka gamu nuago inowewa, atonua! 17 Ema zo nu Anutura ibu gera wamunoya, awa nu da ago ine Anutu meni gera wamunoya. Nera kota, Anutura ibu awa saramai asai awa. Ibu nuso awa nikare awa.

18 Nikare duba nisokare oko etetenawe. Nisokare nana zo nu zebura emara ge niniro dube potitinoise ninai nuso gai witamunoya, ago ine ami ninai awa dotinoise ema dau ine wero ninai me tamaise. 19 Nera kota, zebura kotumai awa Anutu meni ninawi me amu inowia. Amira ge gayai zo ego itia ewa,

- Anutu ninawi ema zebura kotumai puro noise etetenai ge towera amira ge meni kapeteniro nukare geta meni dimago inowia.

20 Are amira zo ego ewa, Ema kotumaire amira kotumai awa puti gege, awa Tua meni gosinowia. 21 Are nikare zazaumuro zebura ema nakare amira zazo zawa toise tama nisokare oko puro witawe. Nena bamubamu awa gegenai nisokare awa. 22 Paulo ata Apolo ata Petoro, nakare awa soumai gegenai nisokare. Zebura nena bamubamu ata nuai ata betai ata nena be zeme emire itia, ata nena ama kei awamunoya — nena awa dapikarago soumai gegenai nisokare daba awa. 23 Nikare awa Kristora soumai gegenai. Ota Kristo meni awa Anutura soumai gegenai awa.